未到新年已經日日有食神啦, 雖然最近有發福跡象🙈, 但都唔理啦, 節日流流美食源源不絕, 繼續貫徹QB家精神, 食左先講啦😋! 過完2月先地獄式減肥啦🤣~ 前日帶囡囡去探朋友, 順手等埋老公係宇晴滙既「上海姥姥」食埋飯先返屋企. 見到佢地有新春賀年套餐《金湯全家福》, 價錢又唔貴, 一於試下, 提早團年!

🍤「姥姥金湯全家福」
上海人春節必食,八款主菜包括海蔘, 上海蛋餃、百葉包、上海鹹肉片、大蝦、雞腿件、炸豬
肉丸和鵪鶉蛋, 湯底以南瓜及番茄熬製而成, 味道清甜不膩. 另外加入津白和粉絲, 沾滿湯汁, 既好味又健康, 新年成日食油膩野, 清淡味道更可喜.
🥟「大紅大紫小籠包」
大紅來自小籠包皮, 以紅火龍果汁搓成; 大紫來自饀料中的帶子諧音, 並混合XO醬和鮮嫩多汁的豬肉, 十分有心思! 小籠包皮厚薄適中, 入口juicy多肉汁, 帶子鮮嫩, 一定要趁熱食呀.
 

🐟「年年有餘老壇酸菜魚」
四川名菜, 岩晒鐘意食辣既我! 一上菜已傳來香辣味道, 魚塊預先起骨, 啖啖肉, 份量又好多, 配合唐芹、肉碎、辣椒乾及花椒粒, 加入老雞豬骨濃湯中烹煮, 味道香濃. 入口先是一陣微微麻辣刺激味覺, 但食落又覺得係香多於辣, 魚肉清, 酸菜香辣, 相得益彰, 係我至愛既菜式。
🍚「吉祥平安八寶飯」
最後係甜品時間, 今次點既唔係經常食既豆沙窩餅或高力豆沙, 而係好養顏既八寶飯! 用八種食材包括紅豆沙、車厘子, 紅棗,紫、白糯米、杏脯、腰果碎和桂花糖. 圓碌碌外型夠晒可愛, 口感煙韌甜甜蜜蜜, 桂花糖夠清香, 飯後解鹹一流. 
最後飲埋熱既雪梨紅棗茶☕, 潤喉暖心, 最重要一家人幸福圓滿!

上海姥姥
地址: 荔枝角深盛路9號宇晴匯2樓25-27號舖
Tel: 22434865

創作者介紹
創作者 SheRiCe 的頭像
SheRiCe

自言自魚 ShallRiceTalk

SheRiCe 發表在 痞客邦 留言(0) 人氣()